Psa 143 | NdeIBE | STEP | Ihubo likaDavida O Jehova, zwana umkhuleko wami, zwana ukukhala kwami ngicela umusa; ngokuthembeka kwakho langokulunga kwakho woza uzongiphumuza.

Psalms 143

Ihubo likaDavida

1 O Jehova, zwana umkhuleko wami, zwana ukukhala kwami ngicela umusa; ngokuthembeka kwakho langokulunga kwakho woza uzongiphumuza.

2 Ungangenisi inceku yakho ekwahlulelweni, ngoba kakho ophilayo ongabe ulungile kuwe.

3 Isitha siyangizingela, singicindezela phansi emhlabathini; singenza ngihlale emnyameni njengalabo abafa kudala.

4 Kanjalo umphefumulo wami uyaphela ngaphakathi kwami; inhliziyo yami ngaphakathi kwami idanile.

5 Ngiyazikhumbula izinsuku zekadeni; ngidla ingqondo ngayo yonke imisebenzi yakho nginakane ngalokho okwenziwe yizandla zakho.

6 Ngiyelula izandla zami kuwe; umphefumulo wami uyakomela njengomhlabathi owomileyo.

7 Ngiphendula masinyane, hawu Jehova; umoya wami uyaphela. Ungangifihleli ubuso bakho funa ngibe njengalabo abaya egodini.

8 Akuthi ukusa kungilethele ilizwi lothando lwakho olungaphuthiyo, ngoba sengibeke ithemba lami kuwe. Ngitshengisa indlela okumele ngihambe ngayo, ngoba ngiphakamisela umphefumulo wami kuwe.

9 Ngikhulula ezitheni zami, O Jehova, ngokuba ngizifihla kuwe.

10 Ngifundisa ukwenza intando yakho, ngokuba unguNkulunkulu wami; sengathi uMoya wakho omuhle kakhulu ungangikhokhela emhlabathini ochayileyo.

11 Ngenxa yebizo lakho, O Jehova, londoloza impilo yami; ngokulunga kwakho ngikhupha ekuhluphekeni.

12 Ethandweni lwakho olungaphuthiyo, thulisa izitha zami; bhubhisa bonke abangizondayo, ngoba ngiyinceku yakho.